شوكولامو نضال الأحمدية

– نضال الأحمدية تطلق حملة (الشوكولامو)!
– شو ؟ شو كلامو، شو كلاما شو كلام مين والناس مقهورين؟؟
– مابتعرف الشوكلاموووو!!! لااا أكيد إنتا سوري! يا خيي هاد آيس كريم شبك!
– أيواااا يعني نضال أطلقت حملة توزيع شوكولولو هذي على اللاجئين السوريين لتخفف عنهم حر الصيف بالخيم..
مغلاها😍😍😍
– لا لا يا حبيبي مش نضااال اللي بتعملا!
– لكان شوووو عملت بالشوكولالامومو…
– نضال الأحمدية أطلقت حملة عنصرية شعواء ضد اللاجئين السوريين، على مايبدو بحجة أنهم لا يعرفون ما هو الشوكولامو!
– أي دخيل البوز اللي مابياكول غير شوكولالو.. 😆

كلما ابتعدت عنها الأضواء، عادت نضال الأحمدية لتلفت إليها الأنظار من جديد؛ وكيف تلفت نضار الأنظال نضال الأنظام الأنظار (عفكرة هذي أصعب من الشوكولالا) إلا بالتصريحات العنصرية ضد اللاجئين السوريين (المعترين) في لبنان! أو خلينا ننتبه نقول “النازحين” مش اللاجئين..
– طول بالك بدي قاطعك، شو الفرق يعني؟
– يا خيي هيك بدا سعادة سيبويه المصطلحات، شو نعمل نحنا إذا ما بنعرف شو هوي الشوكولالو! تركنيييي كفي الخبر..
جاءت تصريحات نضال الأحمدية مؤخراً لتركز على ملف اللاجئين السوريين في لبنان مثيرة زوبعة من العنصرية ضدهم في خضم ما يقاسيه هؤلاء اللاجئون من ظروف معيشية وتخبط بين البقاء في المخيمات البائسة أو الرجوع إلى الديار البائدة، وذلك في مقابلة أجرتها نضال على قناة صوت بيروت إنترناشونال
– عفواً، إنتر شو خيي؟
– يا حبيبي ماتخليني بطل كفي الخبر.. فعلاً إنك سوري مش كلاس وأنإيديوكيتيد!
– يا بااااطل، وشو هااا كمان 😵‍💫 كفي كفي..
– أخي من الآخر، نضال قالت إن السوريين موجودون في لبنان للتنزه والكزدرة والاستمتاع بالكهرباء المجانية والماء المجاني، والسما لألن والأرض لألن…
– أي صح مرة شفت لاجئ سوري ناصب خيمة عالغيمة 😁 وعم يبيع من (حب العزيز) بوظة (عزيزولامو) 😎 شلون الإيفيه 😆
– منيح، بس شو هذي حب العزيز، قديشك بلدي يارجل، هل أنت لاجئ.. أقصد نازح!.. أنيويز مان نكففففي الخبر..
وأضافت الأحمدية، إن السلطات السورية ترفض إرجاع النازحين إلى سورية كونهم شاركوا بالحرب ضدها، عن طريق استخدامهم كأدوات في هذه الحرب!
– أي وشو ذنبهم إذا تم استخدامن؟؟؟
– أي حط بالخرج يازلمي.
– أي والله أحسن شي
– أي أي
– أي
– لك ولعية..
– يلا اختوم الخبر لنروح ناكول شوشومامو
– من عند نضال الأحمدية 😃
– لا من سوق الحميدية 😉
– طيب عطيني رابط مشترك بين الأحمدية والحميدية 🙃
– (بكداش) 😂
– يالطيف شو قوية 😂😂
(ملاحظة: الخبر من إعداد الزميل فداء الحلبي، وهو لا يعكس توجهات الموقع، بل يستخدم الفكاهة كأسلوب عصري في نقل الخبر)